CAGAYAN DE ORO CITY-Dakpan sa kapolisan ang notadong suspetsadong tulisan sa dakbayan kaganinang buntag. Giila ang dinakpan nga si Jason Limbongan, 33-anyos, residente sa Brgy Natubo,Jasaan Misamis Oriental.
Matud ni Sr/Insp Julius Saluta, hepe sa Macasandig Police Station nga kapin usa ka tuig na nila nga gipangita ang suspek lakip na ang nakasibat nga kauban niini.
Misulay pagsukol ang suspek sa mga pulis.
Una niini, nakuha sa iyang posisyon ang usa ka armas, mga bala, sachet sa shabu ug daghang mga yawe.
Samtang ipasaka ang kasong pagsupak sa pagbaton sa ilegal nga droga ug illegal possession of firearms sa kapulisan batok sa nadakpang suspetsadong tulisan dinhi sa syudad.
Si Saluta miingon nga ilang tinod-on pagpasaka’g kaso ang suspek aron dili na kini makaggawas pa sa bilangguan ilabina nga daghan ang nabiktima niini.
Giawhag usab ni Saluta ang mga nabiktima sa motor riding-in tandem nga modangop sa Macabalan Police Station aron madugangan ang kaso nga ipasaka batok sa suspetsado.
Samtang positibong gitudlo sa biktima nga si Melissa Estopito nga si Limbongan mao ang milabni sa iyang bag niadtong bulan sa Pebrero diha sa Aluba, Brgy Macasandig ning syudad.
Matud ni Estopito nga dili niya makalimtan ang barog sa suspek taliwala paman nga wala niya maklaro ang dagway niini tungod kay nakasoot sila sa bonnet ug nag-helmet.
Gikumpirmar usab ni Estopito nga Rouser nga kolor pula ang motor nga giggamit sa mga suspek.
Bisan si Erve Tecson ang nabiktima usab sa nadakpang suspek nga si Limbongan diha sa Brgy Macasandig ning syudad.
Si Tecson miingon nga niadto lang miaging semana siya gilabnihan sa suspek samtang sakay sa motorsiklo nga kolor pula.
Dili niya makalimtan ang panagway sa suspek tungod kay nag-ilog pa sila sa iyang gidalang bag sa wala pa kini makuha sa suspetsado.
