CAGAYAN DE ORO CITY – Napatay sa tropa sa 1st Special Forces Batallion ubos sa 403rd IB,Philippine Army ang babayeng miembro sa rebeldeng New People’s Army o NPA sa Brgy Dilingayon,Valencia City,Bukidnon.
Kini human nasudlan sa militar ang giporma nga kampo sa naghiusang puwersa sa duha ka guerilla front committees sa CPP-NPA nga gikan sa Lanao del Norte ug Bukidnon.
Giila ni 403rd IB Brig Gen Ferdinand Barandon ang namatay nga si Jeraline Cabasag alyas Marco,hingkod ang edad ug nagpuyo sa lungsod sa San Fernando.
Gibutyag sa heneral nga narekober sa militar ang M-14 rifle nga gamit ni Cabasag ingon man ang daghang kagamitan sa mga nakasibat nga mga rebelde nga naglakip sa improvised explosive devices,nagkadaiyang magazines sa armas,pagkaon,tambal ug subersibong mga dokumento sa kalihukan.
Natugyan na usab sa pamilya ang patay’ng lawas sa rebelde samtang namugos ang militar nga walay nasamdan sa ilang tropa dihang natigayon ang engkuwentro sa miaging adlaw.
