CAGAYAN DE ORO CITY – Dakpan ang usa ka NPA member human sa init nga engkwentro sa utlanang bahin sa Claveria ug Gingoog City.
Gikompirmar ni Capt. Leoden Bajado sa 58IB, Philippine Army ang 30 minutos nga engkwentro ug malampusong nadakpan ang usa ka sakop sa SRC-Northern Mindanao Front sa mismong hideout sa NPA sa Mt. Balatucan.
Narekober sa dinakpan ang M-16 rifle ug ubang subersibong dokumento.
Miingon si Capt Bajado nga paningkamutan nilang maabog ang kampo sa mga rebelde sa maong dapit.
Gikalipay sa 4ID ang pagkubkub sa militar sa hideout sa mga NPA sa maong dapit.
Una niini, gihimakak sa militar ang report nga milusad sa mass evacuation ang mga residente nga apektado sa engkwentro.
Namahayag si Bajado nga kapin napulo ka kilometros ang gilay-on sa encounter site sa residential area sa duha ka lugar.
Gani, giila sa militar nga hilit nga bahin sa kalasangan nagkurus ang dalan sa mga sundalo ug militante.
Sa pagkakaron, gipadayon sa militar ang clearing operations ilabe na nga daghan ang samaron sa panig sa mga rebelde.
