CAGAYAN DE ORO CITY -Nagtoo ang militar nga dunay samaron sa mga rebeldeng New People’s Army o NPA nga ubos sa Guerilla Front Huawei,Sub-Regional Command 1 nga samaron sa engkuwentro sa Brgy Banglay,Lagonglong,Misamis Oriental.
Kini human nasulod sa tropa sa 58th IB,Philippine Army ang hideout sa mga rebelde ug nag-resulta sa pila ka minutos nga pagbinayluay sa mga bala.
Gibutyag ni Maj Francisco Garello Jr,tigpamaba sa 4th ID,Philippine Army nga tungod kini sa mga nakit-an nga mga patak sa dugo sa encounter site kagahapon sa buntag.
Namahayag si Garello nga nabawi usab sa tropa ni 58th IB commander Lt Col Ricky Canatoy ang upat ka backpacks,teleskopyo,medical paraphernalia,personal nga kagamitan ug subersibong mga dokumento sa kalihukang armado.
Hinoon,walay natala nga samaron sa panig sa mga sundalo apan gikompirmar usab sa AFP nga may pipila ka pamilya nga napugos pagbakwit gumikan sa operasyon.
Samtang sa pikas bahin,nagkinahanglan karon ang 4th ID,Philippine Army sa gatos ka army reserve officers alang sa Active Duty Tour for Training o CADTT special program sa Armadong Kusog sa Nasud.
Miingon si Garello nga subli gibuksan ang maong programa alang sa army resevered officers aron magsilbing dugang puwersa sa mga kalihukang nag-sentro sa pagtunol nila sa serbisyo sa mga komunidad sa nasud.
Gibutyag ni Garello nga sa mga bakante ug intresado nga reserved officers,mahimo lamang motawag sa hotline numbers nga 0917- 867- 9352 ug 0960- 902-1132.Kini nga special program sulod sa AFP ang molungtad sa duha ka tuig alang sa mga madawat sa pagserbisyo.
