CAGAYAN DE ORO CITY-Kasuhan sa kapolisan sa murder ug frustrated murder ang pito ka sakop sa rebeldeng New People’s Army o NPA nga responsable pagpusil-patay sa police officer ug miangol sa kauban niini sa Sayre Highway, Brgy Sumpong, Malaybalay City, Bukidnon.
Kini human unang giangkon sa NPA nga sila ang namusil kanila ni PO3 Jerry Tropil ug PO1 Reymar Cania samtang naghimo’g police mobile operation sa maong lugar.
Miingon si Police Regional Office 10 spokesperson Police Lt Col Surki Serenias nga usa ka linu-og ang gihimo sa mga rebelde diin migamit sa M-16 rifle aron mapatay si Tropil ug samaron si Cania nga igo ra nahatag seguridad sa katawhan sa maong dapit.
Samtang dili ikalisang sa NPA nga kasuhan sila sa PNP tungod sa pagpatay sa usa ka pulis ug gikaangol sa laing kauban sa Bukidnon.
Miingon si Ka Malim Mabini, tigpamaba sa CPP-NPA North Central Mindanao Regional Committee nga may atraso ang mga biktima sa mga sibilyan hinungdan nga tuyo unta nila bawia’g armas.
Namugos si Mabini nga nakigpinusilay kanila si Tropil ug Cania hinungdan nga nahitabo ang sinukliay sa mga bala.
