CAGAYAN DE ORO CITY – Mitahan sa gobyerno ang duha ka tag-as nga opisyal sa New Peoples Army sa Brgy Manalog, Malaybalay City, Bukidnon.
Giila ni 4th ID commander Maj Gen Andres Centino ang mga mitahan nga si Armando Daluniag alias Ambo, commanding officer sa Headquarters Force Neo sa Northern Central Mindanao Regional Committee, kanhi usab Deputy Secretary sa Guerilla Front 89 ug Roland Lagunday alias Ben, Squad Leader sa Squad 2, Platoon 2.
Gibutyag ni Centino nga gawas sa kakapoy sa kinabuhi sa bukid, nadasig usab nga mo-surender ang mga tawo niini tungod sa pasalig nga tabang ni Pres Rodrigo Duterte dihang mibisita dinhi sa syudad sa miaging semana.
Bitbit sa ilang pagtahan ang 11 ka high powered firearms nga gilakipan sa upat ka M16 rifles, tulo ka AK47 rifles, duha ka M653 rifle, tag-usa ka M230 grenade launcher ug M14 rifle.
Samtang dili gusto si Ka Ambo nga mamatay sa engkuwentro sa militar nga pabiling gutom rason nga mitahn sila sa gobierno sa Bukidnon.
Miingon si Ka Ambo nga una siya nga nagtoo nga makatabang kaniya ang mga rebelde kaniadto hinungdan nga siya misulod sa kalihukan apan walay nahitabo sa iyang kinabuhi.
Gani,nakurat si Ka Ambo nga sulod sa iyang 20 ka tuig nga pakigbisog batok sa kagamhanan,nagbaton na siya sa 29 ka kasong kriminal nga naglakip sa pagpatay ug pagpangsunog sa mga kagamitan sa mga negosyante sa kabukiran.
Kuyog ni Daluniag sa pagtahan ang unom pa sa iyang mga saligando samtang miawhag sa uban niya nga kauban sa bukid nga mangita’g paagi nga makanaug aron makabalik na sa hapsay nga kinabuhi.
