CAGAYAN DE ORO CITY – Gikompirmar sa militar nga nasikop nila ang sakop sa rebeldeng New People’s Army o NPA nga paryente sa pipila ka bakwit gikan sa lungsod sa Lagonglong nga kanhi mi-ukupar sa provincial capitol park sa utlanang bahin sa Gingoog City ug Claveria,Misamis Oriental.
Kini human sunod-sunod nga nagka-engkuwentro ang tropa sa 58th IB,Philippine Army ug 80 ka sakop sa NPA sa bukid sa Balatukan sulod na sa duha ka adlaw.
Miingon si 58th IB commander Lt Col Anthony Roy Derilo nga nasikop nila si Gabriel Hilogon alyas Patrick bitbit ang iyang M16 rifle sa unang hugna sa engkwentro.
Gibutyag ni Derilo nga si alyas Patrick ang pag-umangkon sa lider sa mga bakwit nga si Reynaldo Ayuma o Datu Maghuhukom.
Walay namatay o nasamdan sa panig sa militar sa nahitabong sunod sunod nga engkwentro.
