CAGAYAN DE ORO CITY – Wala hunungi ni 4th ID commanding officer Maj Gen Jose Maria Cuerpo II pagdasig ang mga sakop sa CPP-NPA nga anaa pa gihapon sa bukiran nga motahan na balik sa gobierno.
Kini samtang may ensakto pa nga oras o higayon nga sila makakanaug gikan sa ilang mga kampo aron ug makabalik na sa ilang tagsa-tagsa ka pamilya nga nabiyaan sa dugay’ng panahon.
Gihimo ni Cuerpo ang mensahe alayon sa gitaho ni 403rd IB commanding officer Brig Gen Michelle Anayron nga may laing sakop sa CPP-NPA ang napatay sa tropa ni 2nd Special Forces Company nga gipanguluhan ni Capt.Jenesis Gutierrez nga ubos sa pagdumala ni 1st Special Forces Battalion commander Lt. Col. Roger Anthony Nuylan Jr sa Brgy. Rogero, Bubong, Lanao del Sur.
Miingon ang heneral nga natigayon ang engkuwentro tungod sa gilusad nga complementary operation sa tropa ni Anayron ug sa 103rd IB,Philippine Army batok sa mga rebeldeng sakop sa Platun IPAD ug Platun Huawei nga napugos pagsulod sa Lanao del Sur gikan sa walay hunong nga ginukdanay sa lalawigan sa Bukidnon.
Namahayag si Cuerpo nga nasubo kini sa kamatayon sa laing kinabuhi sa rebelde apan hangtod nga dili sila motahan ug mopakita’g pagsukol,buhatan usab sa puwersa sa estado ang paggukod kanila.
Gawas sa namatay’ng rebelde,nabawi usab sa tropa ang M-16 rifle ug personal nga kabtangan sa mga nakasibat nga mga rebelde sa encounter site.
Wala nabutyag sa tropa ni Anayron kon may sakop niini ang nadisgrasya sa maong engkuwentro.
Hisayrang si Cuerpo ang kanhi commander sa 103rd IB ayha nadestino sa national headquarters ug nabalik sa 4th ID isip bag-ong commander nunot sa pag-retiro sa serbisyo ni Maj Gen Wilbur Mamawag sa miaging Marso ning tuiga.
