CAGAYAN DE ORO CITY – Napatay sa tropa sa 58th IB,Philippine Army ang sakop sa rebeldeng New People’s Army o NPA sa natigayong engkuwentro sa Sitio Minlanag,Brgy Lawaan,Gingoog City,Misamis Oriental.
Gibutyag ni 58th IB commander Lt Col Ricky Canatoy nga anaa sa 20 ka sakop sa Guerilla Front Huwawei ug SRSDG Eagles sa Sub-Regional Committee 1 sa North Central Mindanao Regional Commitee ang gika-engkuwentro sa ilang tropa sulod sa pila ka minutos.
Miingon si Canatoy nga gawas sa patay’ng lawas sa NPA,nakuha usab sa mga sundalo ang duha ka M-16 rifles nga nabiyaan sa mga misibat nga mga rebelde.
Namugos ang militar nga walay samaron o namatay sa panig sa gobierno samtang padayon ang paggukod nila sa mga nakasibat nga mga rebelde.
