CAGAYAN DE ORO CITY – Misamot pa ang paghuyang sa armadong kalihukan sa CPP – NPA tungod sa pagsalikway sa laing 10 ka sakop niini nga naglihok sa pipila ka bahin dinhi sa syudad,Bukidnon ug Misamis Oriental.
Kini human gi-presentar ni Police Regional Office 10 regional director Brig Gen Lawrence Coop ang maong NPA returnees sa publiko pinaagi sa media sa Camp Alagar kagahapon sa buntag.
Giila ni Coop ang mga mitahan sa mga alyases nga sila Spider, Kulot, Dats, Bombet, Waldo, Tuko, Bolt, Bing-bing, Pugon ug Joshua diin dala sa ilang pagtahan ang berret type sniper rifle.
Namahayag si Coop nga gumikan sa gipakusog nga operasyon sa puwersa sa sa gobierno napugos pag-surender ang maong mga rebelde kinsa gipangkapoy ug gipanggutom nga kanunay’ng nagtagu-tago sa kabukiran.
Dumduman nga sa miaging Marso,laing mga rebelde ang mitahan gihapon sa PNP nga naggikan sa lungsod sa Talakag,Bukidnon.
Samtang giputol ni alyas Tuko ang pila ka tuig niya nga pagka-ulipon ug pagsilbing biktima sa puno sa bakak nga pasalig sa CPP-NPA rason nga nahukman niya nga mobalik sa sabakan sa gobierno.
Kini ang iyang pagsaysay kuyog sa siyam niya ka kauban atubangan sa kadagkuan sa PRO 10 kon nganong gisalikway nila ang armadong pakigbisog.
Giangkon ni alyas Tuko nga miubos ang ilang moral kay miabot na lang ang tuig 2023,pabiling walay katumanan ang gisaad kanila nga mahatagan sa kaarangan ang tagsa-tagsa nila ka pamilya ug mahaw-as sa grabeng kalisod.
Ang grupo ni alyas Tuko ang sakop sa sub-regional committee 5 nga ubos sa North Central Mindanao Committee.
