(Update) CAGAYAN DE ORO CITY-Anaa karon sa kustodiya sa rebeldeng New People’s Army o NPA ang police officer nga ilang naharang sa paglusad sa road blockade sa national highway sa lungsod sa Talakag,Bukidnon.
Kini human nakuhaan nila’g armas ingon man ID diin nagmatood nga konektado sa gobierno si PO2 Jerome Anthony Natividad nga nadestino sa Kadingilan Police Station sa Bukidnon.
Eksklusibong gibutyag sa NPA amazona sa Bombo Radyo nga nakuha usab nila gikan kang Natividad ingon sa ilang gipatay nga si Lito Atoy ang ubay-ubay’ng armas nga gidala nila sa ilang pagsibat pabalik sa bukid.
Samtang gilusad sa kapolisan kuyog ang militar ang pursuit operation batok sa rebeldeng NPA nga midagit sa pulis nga naka-destino sa Kadingilan Police Station sa Talakag,Bukidnon kagahapon sa buntag.
Gibutyag ni Bukidnon Provincial Police Office spokesperson Sr/Insp Jisselle Longgakit nga dili pa nila makompirmar kon mismo ang pundok sa mga NPA ang naghawid kang Natividad.
Giangkon ni Longgakit nga naghatag sa dili maayong epekto sa Bukidnon PNP ang pagkadagit sa ilang kauban kagahapong adlawa.
Una nang namugos nga gi-leksyon sa pundok NPA ang tigdumala sa Mindanao Rock Construction Company hinungdan ilang gisunog ang pipila ka ekipo sa paghimo’g kalsada sa Talakag,Bukidnon.
Miingon ang usa ka amazona sa NPA nga pagdaug-daog ang gihimo sa maong kompanya ngadto sa mga trabahante diin sobra ka ubos ang ihatag nga suhulan niini.
Kini ang hinungdan nga ilang gisunog ang dumptruck,mixer,pison ingon man generator set aron dili subli mag-abusar ngadto sa mga trabahante.
Samtang pangilkil sa hinaguan sa laing tawo ang gihimo sa mga rebelde NPA ngadto sa maong construction company.Kini ang pagbulgar ni Tagros nunot sa pasiatab sa mga rebelde sa ilang pagpangsunog.
