CAGAYAN DE ORO CITY- Gipaubos sa dugang imbestigasyon sa militar ang mabdos nga babayeng miembro sa Headquarters Force NEO Compac sa North Central Mindanao Regional Committee o NCMRC nga nabiyaan sa pakig-engkuwentro sa militar sa Sitio Ulayanon, Brgy. Kalabugao, Impasugong, Bukidnon.
Kini human gitumbok ang maong grupo nga responsable sa pag-ambush patay kang Impasug-ong Mayor Mario Okinlay tuig 2014.
Miingon si 8th IB civil military operations head 1Lt Erwin Bugarin nga tuyo usab nila masayran sa suspek nga si Susan Cabusao Guaynon,22 anyos ang kumpirmasyon sa brutal nga pag-ambush-patay sa tulo ka sundalo sa Sitio Kaleb, Brgy Kibalabag, Malaybalay City, Bukidnon niadtong Peb1, 2017.
Nakompiskar gikan sa misibat nga 39 ka NPA rebels ang duha ka AK47 rifles; AR18 rifle; caliber 30 M1 carbine rifle; M4 rifle;air gun; 30 backpacks nga puno sa subversive documents ug personal belongings.
Gikoordinar na usab sa militar ang pamilya ni Guaynon aron direkta makaatiman niini samtang gihataga’g medikasyon sa gobierno.
Nasayran nga si Guaynon ang nasamdan samtang kabahin sa nakig-engkuwentro sa militar sa Impasug-ong sa miaging Sabado sa hapon.
