CAGAYAN DE ORO CITY – (update) Pito ka barangay sa Bukidnon ang dungang mi-deklarar sa New People’s Army isip “persona-non-grata”.
Si 1st Lt Kenneth Cabbigat, Civil Military Officer (CMO) sa 8th Infantry Battallion miingon nga kini nga mga barangay nagpasar sa resolusyon nga nagmando nga abugon, dili pa sudlon ug isumbong sa militar ug kapulisan ang bisan kinsang sakop sa mga rebelde nga musulod sa ilang komonidad.
Lakip sa mga barangay nga mipakanaug sa kamanduan ang Brgy. Caburacanan, St. Peter, Silae, ug Indalasa sa Malaybalay City; ug Brgy. Freedom, Canagaan ug Dalacutan sa munisipalidad sa Cabanglasan.
Kuyog sa deklarasyon sa persona-non-grata ang mga natumbok nga mga “Front Organizations” nga mipaluyo sa rebeldeng CCP-NDF-NPA.
Subli, nanawagan ang 8IB ubos sa 4th Infantry Division sa tanan rebelde nga mukanaug na sa bukid ug mag-avail sa Enhanced Comprehensive Local Integration Program kon E-CLIP aron makapuyo sa malinawon nga komonidad, mahatagan sa libre nga balay ug panginabuhian sa gobyerno.
Dumduman nga sa unang semana sa bulan sa Abril ning tuiga, tolo na ka mga NPA Lead Commanders ang mitahan sa 8IB ug 403rd Brigade sa Bukidnon.
