CAGAYAN DE ORO CITY – Natubag sa namugna nga National Task Force to End Local Communist Armed Conflict o NTF-ELCAC ang mga ordinaryong panginahanglan sa katawhan sa kabayruhan apan dugay’ng gipasagdan sa rason gihimong hinabigan sa Communist Party of the Philippines-New People’s Army o CCP -NPA aron lumpagon ang kagamhanan-Pilipinhon.
Kini ang pagpaambit sa kanhi chairman sa Regional Peace and Order Council o RPOC nga si former City Mayor Oscar Moreno sa pagbakante usab ni Vice Pres Sara Duterte isip vice chairperson sa NTF-ELCAC sa Marcos administration.
Namahayag si Moreno nga dili angay wad-on ang NTF-ELCAC nga naporma pinaagi sa executive order no.70 ni kanhi Pres Rodrigo Duterte apan dunay usbon ilabina ang pagwagtang sa isyu sa red tagging nga giila nga dakong ilegal sa korte suprema.
Samtang dili binuhatan sa Armadong Kusog sa Nasud nga sila ang utok sa red-tagging ngadto sa mga personalidad nga grabe ka kritiko sa pagpadagan sa gobierno sa nasud.
Tubag kini ni Philippine Army spokesperson Col. Louie Dema-ala batok sa balik-balik nga pasangil nga ilang binuhatan ang pagtumbok sa govt critics nga kaanib sa CPP-NPA.
Siya miingon nga trabaho hinoon nila ang paghukas sa maskara sa nagkadaiyang progresibong mga pundok nga nagpatoo nga dapig sa katawhan apan mga sinugo sa komiteng-sentral sa CPP.
Dumduman nga sa ulahing pagbisita ni Pres Bongbong Marcos dinhi sa syudad,namahayag kini nga ipadayon ang NTF-ELCAC ug dili binuhatan sa gobierno ang redtagging apan sa mga kaaway sa estado.
