CAGAYAN DE ORO CITY – Nabutang sa nasudnong atensyon ang giingong away sa politika ug naghinobra nga paggamit sa puwersa sa kapolisan ngadto sa gi-suspenso nga municipal mayor sa lungsod sa Bonifacio,Misamis Occidental.
Kini human gipa-esplikar ni senate public order committee chairman Sen Ronald ‘Bato’ de la Rosa si Misamis Occidental Gov. Henry Oaminal kabahin sa giingong political ug police harassments nga nasinatian ni suspended Bonifacio Mayor Samson Dumanjog sa miaging Hunyo ning tuiga.
Gisaysay ni Dumanjog ang sobra kadaghang pulis nga milusob sa iyang opisina ug ang abuso nga nasinatian niini.
Apan kusganong gihimakak ni Misamis Occidental IMT commander retired Col Roy Ampong ang tanang pasangil ni Dumanjog batok sa provincial govt.
Samtang namugos si Oaminal nga subay sa balaod ang pagpapahawa sa katungdanan ni Dumanjog.
Kini ang depensa sa gobernador batok sa akusasyon sa mayor nga giingong nakasinati sa dili tawhanong pagtratar sa mga pulis ug sakop sa Incident Management Team sa probinsya.
Miingon si Oaminal nga angay lamang pahamatangan sa suspension orders ang mayor kay nakalapas sa balaod samtang gitahasan pagdumala sa maong lungsod.
Una niini,gusto nila senate public order committee chairman Sen Ronald ‘Bato’ de la Rosa ug Sen Jinggoy Estrada nga matuhog ang kamatuoran aron dunay ma-rekomendar nga tukmang kaso nga mapasaka sa hingtungdang ahensiya batok sa masapon nga nag-abuso sa hitabo.
Dugtong niini,gipasalig ni PNP chief Gen Benjamin Acorda Jr nga manubag ang iyang mga pulis nga molugwa sa imbestigasyon nga nagpagamit sa mga politiko ug nag-abusar sa katungdanan sa bangi sa politika sa Misamis Occidental.
Kini human apil gipatawag si Acorda kuyog si Police Regional Office 10 Director Brig Gen Lawrence Coop sa imbestigasyon sa Dumanjog-Oaminal political issue sa senado.
Miingon ang heneral nga wala siya’y palabyon nga mga pulis kon dunay kalapasan sa balaod.
Una niini,nasapon si Bonifacio Police Station Police commander Maj. Rachel Sumagang nga namakak atol sa imbestigasyon kagahapong adlawa.
