CAGAYAN DE ORO CITY – Gikuwestiyon ni Deputy House Speaker Henry Oaminal ang kampo ni Misamis Occidental Gov Philip Tan kon nganong grabe ang pagpangugat ug pagpanghimakak sa nahitabo nga snipping incident nga gikamatay ni Lopez Jaena Mayor Michael Gutierrez.
Kini ilabina nga wala man sila akusahi sa kampo sa kongresista nga may kalabutan sa kamatayon ni Gutierrez nga naigo sa maong hitabo.
Miingon si Oaminal nga makaduda na hinoon ang gipakita sa bando ni Tan taliwala nga wala pa’y resulta sa imbestigasyon sa PNP kabahin niini.
Una niini,mihimo’g prescon ang kampo ni Tan diin sila mipasabot nga walay kalabutan sa hitabo ug mitanyag pa sa reward money aron sa dali nga pagsulbad sa kremin.
Sa pikas bahin,nagbaton na sa SITG-Oaminal-Gutierrez-Almonte sa person of interests nga hayan maghatag sulbad sa snipping attack batok kang Deputy House Speaker Henry Oaminal.
Miingon si Police Regional Office 10 spokesperson Lt Col Michelle Olaivar nga dyutay’g higayon na lang ang ilang gikinahanglan aron mahukasan na sa maskara kon kinsa ang utok sa maong hitabo.
Siya miingon nga daghan sila’g anggulo nga gikonsiderar apan ilugwa lamang kini sa SITG kon may maduso nang kasong murder batok sa mga mihimo kremin.
Hisayrang si Oaminal unta ang target sa M-16 sniper bullet apan wala maigo ug mibanda sa dagway ni Gutierrez ug tangkugo ni kanhi Oroquieta City Mayor Jason Almonte.
