Gipaambit ni National Security Adviser ug National Task Force for the West Philippine Sea Chairperson Eduardo Oban Jr., ang tulo ka estratehikong prayoridad aron malikayan ang tensyon ug mapreserbar ang kalinaw sa West Philippine Sea.
Una, kinahanglan mapugngan ang armadong panagbangi pinaagi sa kredibleng deterrence, padayon nga diplomasya, ug mas lig-on nga komunikasyon panahon sa mga insidente sa kadagatan.
Gipahayag usab niya nga ikaduha, kinahanglan depensahan sa nasod ang lehitimong katungod sa kadagatan ug supakon ang pagpugos nga mahimong hinungdan sa hinay-hinay nga pagkahuyang sa soberanong mga katungod.
Gidugang ni Oban nga ikatulo, importante ang pagpalig-on sa nasudnon ug rehiyonal nga kalig-on aron masiguro nga mapreserbar ang maayong kaugmaon alang sa sunod nga mga henerasyon.
Giawhag usab niya ang kabatan-onan nga magpadayon sa pag-apil sa mga paningkamot alang sa kalinaw ug kalig-on sa South China Sea.


