CAGAYAN DE ORO CITY – Gikasuha’g pagpatay sa piskalya si Lapasan Baptist Church Bishop Dimver Andales kuyog ang laing upat ka respondents nunot sa kamatayon ni Mr.Cagayan de Oro 2023 candidate Adrian Rovic Fornillos sa 13th Street,Brgy Nazareth ning syudad sa miaging Mayo 9 sa kagabii.
Kini ang gikompirmar dinhi sa Bombo Radyo sa abogado sa pamilyang Fornillos nga si Atty.Dale Bryan Mordeno kabahin sa kalambuan sa maong kaso.
Miingon si Moderno nga sa lima ka nagsilbing murder case respondents,duha ang naila nga naglakip kang Andales.
Dumduman nga miagi pa sa pila ka bulan nga ‘case build up’ ang kamatayon ni Fornillos aron masubay ang gitawag nga ‘reasonable certainty of conviction’ batok sa mga matudlo nga mga akusado sa kremin.
Una usab niini,kusganong gihimakak ni Andales nga siya ‘sugar daddy’ sa hinigugmang babaye ni Fornillos hinungdang iyang gipapatay.
Namugos ang pastor nga dili niya mahimo ang maong kremin apan dako siya’g kasingkasing pagtabang sa mga tawo nga nanginhanglan sa iyang panabang.
Samtang sa pikas bahin,gikalipay sa kampo ni Andales nga nakaabot na sa piskalya ang kasong pagpatay kang Fornillos.
Miingon si Atty. Rhobert Maestre,abogado ni Andales nga kini tungod kay mahatagan na sila sa igong higayon aron pamatud-an nga bakak ang tanang pasangil nga mugna sa panig sa pamilyang namatyan.
Namahayag si Maestre nga gitahod nila ang trabaho sa piskalya kay hayan dunay basehan nga patubagon nila si Andales isip kabahin sa proseso sa pagligid sa kaso.
