CAGAYAN DE ORO CITY – Gi-alerto ni kanhi City Mayor Oscar Moreno ang katawhan kabahin sa iyang gidudahan nga pulihan sa kasamtangang administrasyon sa pribadong pagdumala ang Cagayan de Oro Water District o COWD.
Kini human unang nagtoo ang kanhi mayor nga pagpatay sa COWD ang posibleng tumong kon nganong wala uyuni ni City Mayor Rolando ‘Klarex’ Uy ang hangyo nga pag-usbaw sa bayrunon sa tubig aron magamit sa dugang serbisyo sa katawhan.
Siya miingon nga angayang dumdumon ni Uy nga katawhan ang tag-iya sa sistemang panubig sa syudad nga igo lang gipadagan sa COWD ubos sa superbisyon sa LWUA.
Una niini,namahayag si Mayor Klarex nga dako kining supak sa pangayuon nga usbaw sa COWD rason nga gitahasan niya ang konseho nga imbestigaran ang mga kontrata sa panubig nga gisudlan sa syudad ug kompanyang Metro Pacific Water Consortium.
Hisayrang sa wala pa mihupas ang termino ni Moreno,mipahulam ang city govt sa 500-milyones pesos sa COWD alang sa water rehabilitation program apan giingong wala ipatuman sa Uy administration.
