CAGAYAN DE ORO CITY – Kawad-on sa katukuran sa tunghaan ug walay occupancy permit ang pipila sa gitudlong basehan ni City Mayor Rolando ‘Klarex’ Uy kon nganong wala gilayon nagamit ang balor 64 milyones pesos nga Cugman National High School sa Brgy Cugman ning syudad.
Kini ang pagpasabot sa mayor dungan sa pagpasalamat sa local school board nga gigahina’g 30 milyones pesos ang maong tunghaan aron hingpit nang mapuslan sa mga tinun-an sa lugar sa daling panahon.
Namahayag si Mayor Klarex nga natingala usab kini nganong walay linya sa koryente ug kutay sa tubig rason nga napun-an ang suliran nga magamit gilayon ang 42 ka lawak-saringan nga gigastohan sa syudad sa miaging administrasyon.
Hisayrang ang maong tunghaan ang gihimo na lang suyupunan sa pipila ka adis-adis ug gipangkawat usab ang wiring sa koryente niini sa milabay’ng duha ka tuig nga pagtugyan niini sa syudad.
