CAGAYAN DE ORO CITY – Giduot ni City Mayor Rolando ‘Klarex’ Uy si kanhi City Mayor Oscar Moreno nga pinakarason kon nganong nalubong sa minilyong utang ang Cagayan de Oro Water District o COWD ngadto sa kompanya ni Manny V. Pangilinan nga mao ang Metro Pacific Waters – Cagayan de Oro Bulk Incorporatred o MetroPac-COBI.
Miingon ang mayor nga kon nagtarong pa lang unta pagtrabaho si Moreno sa iyang panahon,dugay rang nasulbad ang suliran sa panubig sa dakbayan.
Gibulgar usab ni Uy nga bisan ang 500 milyones pesos nga gigahin ni Moreno sa COWD ang wala magamit kay na-divert sa pipila ka supplemental budget.
Apan duda si kanhi City Mayor Oscar Moreno nga dunay pasudlon si City Mayor Rolando ‘Klarex’ Uy nga laing kompanya nga mo-suplay sa panubig sa dakbayan.
Kini tungod sa gihimong lakang sa mayor ug konseho nga pag-kuwestiyon sa kontrata tali MetroPac-COBI-COWD joint venture pinaagi sa imbestigasyon sugod kagahapong adlawa.
Namahayag ang kanhi mayor nga dili makalikay ang COWD sa obligasyon nila sa MetroPac rason nga angay kining sulbaron ug likayan nga dugangan ang problema.
