CAGAYAN DE ORO CITY – Gikaon ni City Mayor Rolando ‘Klarex’ Uy ang kaugalingong gisulti niini nga daw walay hurisdiksyon ang Local Water Utilities Administration o LWUA nga idumala ang Cagayan de Oro Water District o COWD.
Kini tungod sa contract conflict niini ngadto sa MetroPac-COBI.Kini ang reaksyon ni kanhi City Mayor Oscar Moreno kabahin sa gilayong pag-aksyon sa LWUA sa mando ni Pres.Bongbong Marcos nga sudlan ug e-dumala ang COWD sa dakbayan.
Namahayag ang kanhi mayor nga dako kini nga problema sa grupo ni Mayor Klarex kay mismo na ang Malakanyang ang nakatutok hangtod nga masulbad ang suliran sa panubig sa syudad.
Dumduman nga milabay’ng mga semana,dunay manifesto nga gipapirmahan ang alyadong mga kapitan sa city government aron supakon ang pagsulod sa LWUA sa COWD takerover gumikan sa maong isyu.
Gani,gibatikos usab ni Uy ang pagduso’g House resolution ni Cagayan de Oro 1st District Cong. Lordan Suan kay dili daw kini angay manginlabot sa mga kalihukan sa dakbayan.
Apan tubag usab ni Suan kang Uy nga dili kini susama sa ubang government officials nga igo lang magtanga bisan kon nag-ungaw sa dakong peligro sa pagwad-ig tubig ang distrito uno diin sila managsama nga nanimuyo.
