CAGAYAN DE ORO CITY – Nagtoo si Xavier University (XU) Law School Professor Atty. Oscar Moreno nga mibati’g gamay’ng kabalaka ang kampo ni Vice Pres. Sara Duterte.
Kini human miduso’g mga kaso sa Korte Suprema si VP Sara batok sa impeachment complaint nga gisang-at sa liderato ni House Speaker Martin Romualdez ngadto sa senado.
Kini aron pugngan ang pagligid sa pagdungog kay alang sa kampo sa bise-presidente wala mosubay sa ensaktong proseso ang gipamugos sa kamarabaha nga pagpalagpot kaniya.
Miingon si Moreno nga hinoon, walay kasiguruhan nga makakuha sa 2/3 vote convictions o 16 ka senador nga magpabor sa impeachment batok Sara apan adunay lain pa nga gipangandaman sila niini.
Namahayag si Moreno nga kini mao ang pag-abli sa bank deposits ni VP Sara nga posibleng adunay dako nga mobuto sa maong imbestigasyon.
Kini tungod kay dili na makontrol kon unsa ang unod sa bank deposits nga hawid ni VP Sara.
Siya miingon nga kung subayon ang sugo sa balaod,dili gyud unta mahimong pugson nga ablihan ang personal account sa tag-iya niini subay sa Law of Secrecy of Bank Deposits.
Apan adunay tulo sa mga eksemsiyon niini nga mapugos ang paglugwa sa unod sa bank deposits.
Kini gilakipan sa mismong pagtugot sa tag-iya sa bank deposits,kung kinahanglan kay ang mismong pondo ang angay imbestigaran ug tungod sa panginahanglan sa impeachment.
