CAGAYAN DE ORO CITY – Dili angay basulon si Cagayan de Oro 1st District Cong.Lordan Suan kon nagka-grabe ang suliran sa trapiko kay anaa sa city hall ang kontrol sa mga kalihukan sa dakbayan.
Kini ang depensa ni kanhi City Mayor Oscar Moreno nunot sa pagduot ni incumbent City Mayor Rolando ‘Klarex’ Uy ang Suan nga nahasol ang daghang motorista nga moagi sa Macapagal Drive padulong Brgy Canitoan kay walay koordinasyon ang duha ka panig.
Miingon si Moreno nga klaro ang motibo ni Uy nga ipiton ang mga proyekto sa kongresista aron molugwa nga wala kini gihimo sa distrito uno.
Siya miingon nga tinuyo ang paglisud-lisod ni Klarex sa mga proyekto ni Suan kay dili niya gusto makit-an sa katawhan nga malabwan ang iyang siyam ka tuig isip kongresista.
Una niini,giakusahan ni Klarex si Suan nga maoy tag-iya sa Macapagal Drive-Brgy Canitoan project nga nakahatag trapiko sa mga motorista nga gasulod-gaaas sa maong lugar diin kusganong gihimakak sa kongresista.
