CAGAYAN DE ORO CITY – Nagkakitaay’g balik ang kanhi alyado sa politika nga sila incumbent City Mayor Rolando ‘Klarex’ Uy ug former City Mayor Oscar Moreno dul-an tulo ka tuig na ang milabay sukad nagkabulag ang ilang mga linya sa politika sa dakbayan.
Kini human pulos mitambong ang duruha kuyog sa ilang mga linya sa gilusad nga political unity walk sa Commission on Elections nga nanukad sa Rodelsa Circle sa Rotonda,Brgy Macasandig padulong sa Amphitheater,Divisoria ning syudad kaganihang sayo sa buntag.
Apan wala magkaduol ang duruha ug hinoon ang laing mayoralty candidate nga si former Department of Agriculture undersecretary ug past Phividec administrator Jose Gabriel ‘Pompee’ La Viña ang nagsilbi nila nga neutralizer alayon sa mubo nga kalihukan nga gipahimo kanila sa Comelec.
Sa mubo nga programa sa Comelec,nakig-atubang ang Comelec officials ug volunteer groups sa mga kandidato aron pasalamatan ug pagdumduman sa ilang mga kaakuhan sa taliabot nga kampanya ingon man sa mismong adlaw sa piliay.
Apan nabantayan sa mga sakop sa prensa ug katawhan sa palibot wala magtinagdanay ang duruha hangtod nga nahuman ang covenant signing alang sa hapsay ug limpyo nga piliay.
Igo paghuman ni Klarex pagpirma sa covenant signing sa mga kandidato,midali na kini pagbiya sa lokasyon kay mibalik sa opisinal sa city hall tungod daghang tiwasunon nga mga trabaho.
Sa pikas bahin, nagkalamanuhay ang mga bagitong mga anak sa pamilyang Uy ug kaliwat Suan sa susamang kalihukan.
Kini pulos gipakita ni Cagayan de Oro 1st District Cong. Lordan Suan ug Carmen Punong Brgy Kikang Uy taliwala sa ilang grabe nga panagtigi sa politika sa distrito uno.
Nagtimbayaay pa ang duruha timaan nga daw walay personalan apan trabaho lang ang anaa sa ilang kasingkasing
Unang higayon magbangga sila ni Moreno ug Klarex sa pagka-mayor.
Apan si Klarex ug Pompee ang makaduha na ingon man sila Suan ug Kikang mag-rematch sa Mayo 12 nga piliay.
