CAGAYAN DE ORO CITY – Mitala na sa duha ka kinabuhi sa tawo ang namatay gumikan sa walay hunong nga mga pag-ulan nga miresulta sa mga pagbaha epekto sa low pressure area o LPA sa Misamis Oriental.
Kini human kompirmaha ni Misamis Oriental PIO consultant Roy Waga nga nakit-an na ang unang missing nga si Rey Sabado,42 anyos nga nagpuyo sa Brgy Tama,Magsaysay ning lalawigan.
Miingon si Waga nga magpila usab ka adlaw nga missing ang biktima ug nakit-an lamang kini nga wala na’y kinabuhi kagahapon sa buntag.
Samtang gitaho usab niini nga pabiling missing ang usa ka mag-uuma nga si Bonifacio Damalan nga taga-Alubijid ning lalawigan.
Siya miingon nga tuyo unta luwason sa biktima ang iyang tinigway nga baka apan naabtan kini sa kusog nga sulog sa pagbaha.
Una usab niini,may usa ka bata nga nalumos-patay samtang misunod sa iyang amahan apan naabtan sa baha diha sa lungsod sa Balingasag ning lalawigan.
Samtang namiligro nga mosaka pa ang ihap sa pipila ka residente nga nakabsan sa kinabuhi tungod sa mga pagbaha gumikan sa LPA sa Northern Mindanao region.
Kini human wala pa makaabot sa Office of the Civil Defense 10 ang duha ka namatay’ng residente nga gikan sa Misamis Oriental ug laing duha nga missing sa Alubijid ug dinhi usab sa dakbayan.
Miingon si OCD 10 asst regional director Gilbert Conde nga bugtong anaa pa lamang ilang data ang lima ka kompirmadong namatay diin gikan ang upat sa Lanao del Norte ug laing usa sa Misamis Occidental.
Siya miingon nga mitala na usab sa minilyong balor sa damyos sa sektor sa agrikultura ug imprastratura.
