CAGAYAN DE ORO CITY – Gipanghimaraot karon sa hinigugma sa usa ka OFW ang kanhi kapikas niini nga midunggab-patay tungod sa isyu sa love triangle diha sa Brgy Bulua sa syudad kagabii.
Kini human pabiling dili pa madawat sa suspek nga si Rexor Galendez, 29 anyos nga taga-Maramag, Bukidnon nga may ka-relasyon na ang kanhi kapikas niini nga si May-May Porcadilla ngadto sa biktima nga si Rebson Dacer, 29, may kapuyo, ug nagsilbing mechanical trainor sa South Korea.
Gibulagan ni Porcadilla si Galendez tungod sa pagka-hingulata niini ngadto kaniya sa miagi nga mga bulan hinungdan nagkaila usab sila ni Dacer pinaagi sa pagdula’g clash of clans o CoC sa internet.
Una nang gidunggab sa suspek gamit ang 11 pulgada nga kutsilyo ang likod sa biktima samtang pasulod na unta sila sa pinuy-anan ni Porcadilla sa Brgy Bulua sa syudad kagabii.
Samtang pursigido pagduso’g kasong murder ang pamilyang Dacer batok suspek sa piskalya sa syudad. Kini aron masikop sa daling panahon si Galendez.
Hisayran nga moabot na sa unom ka bulan nga magkarelasyon si May-May ug ang napatay ng ka-live-in partner. Selos ang gitumbok nga hinungdan sa duguong insidente
