Puno sa kakurat ang gibati sa Pamilyang Opeña, dihang ilang gisugat ang lawas sa ilang igsoong nurse nga namatay sa Dubai City, United Arab Emirate.
Unang nagpakitabang sa BOMBO RADYO CDO ang igsoon sa Overseas Filipino Worker (OFW) tungod kay wala silay nadawat nga gamay nga abiso sa hinungdan sa kamatayon sa iyang 60 anyos nga igsoon nga si Julie Opeña Gumaldo, residente sa Misamis Oriental.
Sa interview sa programang ZONA LIBRE, miangkon si Romeo Opeña nga nagduda sila sa report nga walay foul play sa hitabo, kay base sa ilang nakita, daghang bun-og sa lawas, hubag sa kamot, bukton, ug adunay markings sa li-og nga posibleng gituok.
Maoy ilang nakita sa medical report nga namatay ang biktima sa cardiac arrest.
Laraw sa pamilya Opeña nga ipa-otopsiya ang lawas sa ilang igsoon, ning adlawa.
Una niini, nahimong tulay ang Bombo Radyo CDO sa pagkutay sa linya sa Department of Migrants Workers, Overseas Workers Welfare Administration (OWWA) -10 aron mahatagan sa tabang nga legal ug pinansiyal ang nahibiling pamilya sa biktima.
Gisulayan ning sibyahan ang pagpangutana sa OWWA kung nganong walay bisan usa sa ilang representante ang misugat sa lawas sa nasampit nga OFW.
Kini ang rason nga gikuwestiyon sa pamilya kung nganong wala masayud ang OWWA sa kahimtang sa ilang igsoon, lakip ang pagkuwestiyon sa koordinasyon sa DMW, OWWA-10 ug embahada sa Dubai.
Wala tubaga sa OWWA-10 ang among hangyo nga interview ug nagtext lamang sa among reporter nga dili na kinahanglan ang interview kay muhatag ra sila‘g assistance.
