CAGAYAN DE ORO CITY, Philippines Mukabat sa 11,000 ka mga Overseas Filipino Workers ang nanarbaho sa Lebanon, ug 75% sa maong ihap nakabase sa capital City, sa Beirut.
Kumpirmasyon kini ni Department of Migrant Workers Secretary Hans Leo Cacdac, subay sa listahan nga ilang kasamtangang nahuptan.
Miingon si Cacdac nga sa milabay’ng semana, dul-an gatus na ang repatriated sa Pilipinas ug padayon ang ilang pag-awhag sa uban pang mga pinoy workers nga dawaton ang tanyag sa gobyerno ilabe na nga mi-abante na ang opensiba sa kasundaluan sa Israel sa tunga-tunga nga bahin sa maong nasud.
Apan sa pakighinabi sa Bombo Radyo sa usa sa mga trabahanteng pinoy sa Beirut, gipamugos ni Sheryl Melarphis, nga layo ra sila sa gi-atake nga lugar ug luwas man tanan OFWs nga nanarbaho sa Beirut.
Wala laraw nga mubalik sa nasud si Melaphis tungod sa kalisud ug sobra ka gagmay ang suhulan sa Pilipinas.
Hinoon, kanunay silang alerto gamit ang ilang facebook messenger isip nag-unang kutay komonikasyon tali sa iyang mga kaubang OFWs nga nakabase sa maong dapit.
Si Melarphis, lumad nga taga Bacolod City, Negros Occidental.
