(Update) CAGAYAN DE ORO CITY – Nahiagom sa sobra P18.6 milyones ang giingong personal damages sa mga kabtangan sa pagkasunog sa 42 ka balay nga gi-okupahan sa 76 ka pamilya o 303 ka indibiduwal sa Zone 6, San Lazaro,Barangay Lapasan ning syudad.
Kini sumala sa gikuptang datos ni Lapasan Punong Brgy Julito ‘Litlit’ Ogsimer gikan sa iyang mga gitahasang sakop nga nag-damage assessment ngadto sa mga biktima.
Namahayag si Ogsimer nga basehan nila kini alang sa paghatag sa ginagmay’ng ayudang pinansyal subay sa standby calamity fund sa barangay.
Iduso usab kini nila nga mga impormasyon ngadto sa city hall aron sumbanan sa posibleng matunol nga tabang ngadto sa mga biktima.
Kasamtangang nangayo pa gihapo’g dugang tabang ang konseho sa barangay alang mga apektadong mga pamilya sa trahedya.
Hisayrang anaa sa P6 milyones pesos ang structural damage nga pagbana-bana sa Bureau of Fire Protection samtang wala pa nagpalugwa sa resulta sa imbestigasyon sa pinakarason sa sunog.
