CAGAYAN DE ORO CITY – Miigo na ang oil spill sa kadagatang sakop sa Brgy Luz Banson sa lungsod sa Jasaan,Misamis Oriental.
Gikompirmar ni Luz Banzon Brgy Kap Daylinda Badelic kuyog si Lower Jasaan Brgy Kap Sabas Tagarda ingon man ang Philippine Coast Guard ang nakasaksi sa maong oil spill nga posibleng konektado sa pagkaunlod sa MV Racal nga barko nga magpila ka bulan nang naka-angkla sa kadagatang sakop sa maong lungsod.
Gilayong mipakatag sa oil spill booms ang PCG aron dili makahatag sa dugang kadaot ang maong hugaw gikan sa barko sa lapyahan ug ubang bahin sa lungsod.
Samtang gidangop na usab kini nga suliran sa mga hingtungdang ahensiya sa gobierno alang sa tukmang aksyon.
Una nang gitoohan nga ang sobra ka karaan ug pagkadugta sa ilawom nga bahin sa barko ang hinungdan nga kalit kining naunlod samtang gipabantayan sa duha ka tawo kay ipaayo unta sa Philippine Iron Construction and Marine Works, Incorporated o PICMW sa lugar.
