CAGAYAN DE ORO CITY – Nagkupot sa taas nga pagrespeto ug pagdayeg gikan sa nagkadaiyang foriegn boxing coaches ug mismong mga boksidor ang garbo sa Pilipinas nga gikan sa Cagayan de Oro City nga si 2020 Tokyo Olympics silver medalist Carlo Paalam nga kabahin sa 22 ka atleta nga atua sa Paris Olympics.
Kini ang pagsaysay sa iyang long-time boxing coach Elmer Pamisa nga kuyog niya sa ilang kampanya nga magbaton sa dakong kalampusan sa Olympics sa Pransya ning tuiga.
Namahayag si Pamisa nga daghan sa boxing coaches ang bilib sa angkon nga abilidad ni Carlo rason nga gihulagway nila kini nga numero uno ug banggiitang boksingero ubos sa iyang timbang.
Siya miingon nga bisan ang mga boksingero sulod sa amateur boxing,mobati usab sa dakong garbo kon ikasangka man lang si Carlo ibabaw sa ring.
Apan namahayag usab kini nga dili nila ikatugot nga basta-bastang madaut ug mabulingan ang maayong boxing record ni Paalam.
Samtang dili pa maka-komento si Pamisa kon unsay sunod nga plano ni Carlo kon pananglitan molampos na kini pagsakmit sa medalyang bulawan alang sa Pilipinas.
Hisayrang sukad 1924 nga Olympics nga pag-apil sa Pilipinas, pabiling idlas ang gold medal nga makuha rason nga pursigido ang lima ka boksingero sa 2024 Philippine contingent nga bisan usa kanila ang makatuman niini nga katumanan.
