CAGAYAN DE ORO CITY- Gitakdang ipaubos sa bone marrow transplant ang Pinay Olympian nga Cagay-anon table tennis player Ian ‘Yan-Yan’ Lariba sa Saint Luke’s Medical Center sa kauluhan sunod bulan sa Agosto ning tuiga.
Kini subay sa rekomendasyon sa mga doktor ni Lariba nga nagpaubos kaniya sa chemotheraphy tungod sa sakit nga leukemia.
Gibutyag sa inahan ni Ian nga si Mel Lariba nga dili suliran ang responde sa lawas ni Ian ilabina niadtong panahon nga gipaubos siya sa chemotheraphy.
Nagpasalamat usab ang pamilya sa gobierno,pribadong mga grupo ug indibidwal nga mitabang sa hospitalization ni Ian sukad nadiskobre ang sakit niini.
Dugtong niini,naghangyo sa laing higayon sa tabang-pinansyal ang 22 anyos nga table tennis player nga sila maabagan sa pagsagubang sa uno ngadto tres milyon pesos nga bayronon sa bone marrow transplant operation.
Sa pagkakaron,kasamtangang nagsaka si Ian sa condo unit sa iyang higala sa kauluhan samtang gipaabot ang operasyon niini.
Hisayrang si Ian ang unang table tennis player nga mi-representar sa Pilipinas sa 2016 Rio de Janerio Olympics sa Brazil.
