CAGAYAN DE ORO CITY – Hingpit nang nadagit sa boksingerong gikan Zamboanga City nga si Tokyo Olympics bronze medalist Eumir Marcial ang babaye nga garbo sa Cagayan de Oro City nga sakop usab sa national boxing team nga si Princess Jenniel Galarpe.
Kini human kasla ang duruha sa Pico De Loro Nasugbu, Batangas kagahapong adlawa.
Managsama nga national boxing players ang 26 anyos nga si Marcial ug ang nag-edad 25 nga si Jenniel hinungdang sila nagkakita ug nagkahigugmaay sulod sa siyam ka tuig.
Nahimong sayon ang pagkuha ni Marcial sa pagtugot sa ginikanan ni Jenniel kay nakita naman nila nga daan kon unsa kini ka responsable,respetado ug matinabangon ngadto sa uban.
Nakahukom magpakasal ang duruha pipila ka bulan gikan sa engagement ug ang produktibong output ni Marcial sa Olympics diin siya nakadawat sa sobra 10 milyon pesos nga cash ug ubang insentibo.
Si Jenniel ang anak sa kanhi Cagayan de Oro boxing trainer ug international referee nga si Reynaldo Galarpe ug pag-umangkon usab siya ni amateur Asian boxing gold medalist Roberto Jalnaiz.
Hisayrang imbitado usab ang fellow Olympians ni Marcial nga sila weightlifting gold medalist Hidilyn Diaz,boxing silver medalists Carlo Paalam ug Neshty Petecio.
