CAGAYAN DE ORO CITY- Naghangyo karon ang pamilya ni Pinay olympian Ian ‘Yan-Yan’ Lariba sa katawhan nga mohalad sa pag-ampo alang sa iyang paspas nga health recovery.
Kini human gipaubos sa chemo-therapy Pinay table tennis player nga si Lariba tungod sa gihambin niini nga acute myeloid leukemia o AML.
Gibutyag sa Bombo Radyo ni Tony Lariba nga unta ubanan sila sa katawhan sa ilang pag-ampo nga dali makalinggawas sa gihambin nga sakit si Yan-Yan.
Si Yan-Yan ang unang na-diagnose nga nagbaton sa leukemia dihang nagpaubos kini sa final training alang unta sa iyang championship game sa Germany sa miaging semana.
Nalipay na lamang si Mr Lariba nga wala makadayon ang ilang anak nga maka-biyahe sa Germany kay dako unta kaayo ang atubangon nila nga suliran.
Si Yan-Yan ang pinakauna nga Pinay table tennis player nga mi-representar sa Pilipinas sa Rio de Janiero Olympics sa Brazil sa tuig 2016.
Hisayrang si Yan-Yan ang produkto usab sa Palarong Pambansa ug makapila nga nag-representar sa daghang higayon sa South East Asian Games o SEA Games.
