Dili manginlabot sa Office of the Ombudsman ang bag-ong reklamo nga gi-endorso sa Kamarabaha batok kang Vice President Sara Duterte.
Namahayag si Ombudsman Samuel Martires, limitado ang gahum sa ilang opisina subay sa Republic Act No. 6770 o ang Ombudsman Act.
Segun sa nalatid sa section 21 ug 22 sa RA 6770, ang Ombudsman walay disciplinary authority sa mga opisyal nga pwede ra mapapahawa pinaagi sa impeachment sama sa bise presidente o presidente.
Ang ilang gahum kutob ra sa imbestigasyon para sa katuyuan nga mag-file sa verified impeachment complaint sa Kongreso.
Walay gahum ang Ombudsman nga ipahunong ang impeachment tungod kay hawid na sa senate impeachment court ang kaso.
Sa pagkakaron, si VP Duterte nag-atubang sa daghang seryosong alegasyon, lakip ang technical malversation, falsification of public documents, perjury, bribery, corruption of public officers, plunder, betrayal of public trust, ug culpable violation of the Constitution.
Ang mga kaso may kalabutan sa giingong pag-abuso sa confidential funds sa iyang opisina ug sa Department of Education sa panahon nga siya pa ang kalihim niini.
Gi-imbestigaran usab ang bise presidente sa Department of Justice ug sa National Bureau of Investigation tungod sa iyang kontrobersyal nga pamahayag kabahin sa hypothetical nga pagpapatay sa mga opisyal sa gobyerno, nga giisip nga grave threats ug inciting to sedition.
