CAGAYAN DE ORO CITY – Nakadugang sa kapiot sa mga selda ang 2-mil 324 ka indibidwal nga nadakpan sa kapolisan sa nagkadaiyang pasangil sa pagsupak sa balaod palibot sa Northern Mindanao.
Kini epekto sa kamanduan ni Police Regional Office 10 Director Brig Gen Jaysen De Guzman nga walay ihatag nga paghugak sa kampanya batok tanang klase sa kreminalidad.
Sulod sa iyang ika-gatos ka adlaw sa pagpangulo sa PRO 10,nakahimo ang lower units sa 683 ka operasyon diin nag-resulta sa sobra 2-mil ang nangadakpan.
Kini naglakip sa pagkasikop sa 842 ka suspected drug pushers diin nakuhaan sa kapin 5-mil gramos sa gitoohang shabu ug laing sobra libo ka gramo sa marijuana diin adunay kostar nga sobra P38 milyones.
Nadakpan usab ang 312 ka suspected sugarol ug adunay koneksyon sa illegal nga pasugal sulod sa 241 ka operasyon palibot sa rehiyon.
Nahipos usab ang 985 ka personalidad nga adunay mga atraso sa balaod nga naglakip sa 170 ka most wanted persons.
Sa anti-smuggling operations usab, nakompiskar ang lower units sa kapin 58 milyones pesos nga sagad mga inismagol nga mga sigarilyo ug laing sobra `18 milyones pesos nga illegal mining equipment gikan sa mga pagkalut-kalot sa kabukiran.
Sa maong magkalahi nga operasyon,anaa sa sobra gatos ka indibidwal ang nakasuhan sa nagkadaiyang kasupakan sa balaod.
Gipaabot ni De Guzman ang iyang pagpasalamat sa tanang tropa kay dili tiaw ang kahago ug sakripisyo nga ilang nabuhat aron pagsanong sa kagustuhan sa liderato sa PNP.
