CAGAYAN DE ORO CITY – Nag-una ang Pilipinas sa medal tally sa unang adlaw pa lamang sa 30th Southeast Asian Games didto sa kauluhan.
Kini human mihakot sa 23 ka gold medals, 10 ka silver ug upat ka broze ang Team Philippines kagahapong adlawa.
Nakakuha ang Pilipinas sa napulo ka medalyang bulawan sa dancesport competition.
Ang tandem nila ni Mark Jayson Gayon ug Mary Joy Renigen ang misakmit sa back-to-back gold medals sa single dance waltz ug single slow foxtrot.
Wala usab nagpa-ulahi ang tandem nila ni Sean Mischa Aranar ug Ana Leonila Nualla nga miangkon sa gold medals sa single dance tango ug single dance Viennese waltz.
Sa sepak takraw, midaug ang Pilipinas kontra team Indonesia sa women’s hoop event sa score nga 670-660 aron makuha ang gold medal ug gipukan usab sa men’s team ang team Laos sa score nga 670-430.
Samtang sa dulang ‘arnis’ nag-overall champion ang men’s division tungod sa upat ka gold medals nga ilang nasakmit.
Gipukan ni Dexter Balambao ang player sa Myanmar sa bantamweight division aron sakmiton ang medalyang bulawan ug midaug si Niño Mark Talledo sa featherweight division kontra sa magdudula sa Vietnam.
Naka-gold usab si Villardo Cunamay sa lightweight division ug Mike Bañares sa welterweight division.
Sa triathlon, naka-back-to-back win ang Pilipinas sa men’s individual triathlon ug women’s triathlon.
Nakakuha usab sa gold medal si Agatha Wong sa women’s taichi quan sa dulang wushu.
Samtang gilatos sa women’s team sa Gilas Pilipinas ang team Myanmar sa basketball competition sa score nga 21-4 ug ila usab gipukan ang team Indonesia sa score nga 16-13.
Wala usab pakyasa ni World gymnastics champion Carlo Yulo ang iyang mga fans gumikan sa imprisibong performance nga iyang gipakita diin iyang nasakmit ang medalyang bulawan sa ‘individual all-around event’ sa men’s artistic gymnastics.
