CAGAYAN DE ORO CITY – Napun-an ang kalipay ni City Mayor Oscar Moreno dihang nasayran sa Bombo Radyo nga qualified na si 2018 Asian Games bronze medalist Carlo Paalam alang sa final round sa SEA Games 2019.
Kini human pildiha ni Paalam via unanimous decision ang kanhi miparot kaniya sa 2017 SEA Games nga si Malaysian boxer Muhamad Fuad Mohd Redzuan sa semi-final round sa PICC kagahapon sa hapon.
Miingon si Moreno nga unta kanunay nga pokus si Paalam ilabina nga lig-ong boksidor ang sunod niini ikasangka sa finals nga gikan sa Indonesia sa adlaw’ng Lunes.
Samtang gisiguro ni Paalam nga dili maka-porma si 2017 SEA games gold medalist Muhamad Fuad Mohd Redzuan sa ilang semi-final round bout.
Kini tungod kay dili na gusto ni Paalam nga subli matikasan sa ilang away ni Muhamad sama sa nahitabo sa Malaysia sa miaging SEA Games 2017.
Miingon si Paalam nga pursigido siya nga mokab-ot sa medalyang bulawan rason nga giayo niya ang iyang mga away aron makahatag sa dungog sa nasud ug makaapil sa Olympics.
