CAGAYAN DE ORO CITY-Gikabalaka sa pipila ka handlers ang kahimtang sa ilang seguridad sukad nabulabog ang ‘1K TURNS TO 1,700 IN JUST 10 DAYS’ online investment scam ning syudad.
Kini human angkona sa handler nga si alyas Melinda nga daghan sa iyang investors ang nagkuwestiyon kon nganong kalit nahunong ang operasyon sa gisudlan nila nga investment.
Gani,naglibog na si alyas Melinda sa angay buhaton tungod sa kadako sa salapi nga i-uli niini sa iyang investors.
Si alyas Melinda ang nakabubo sa P1.3 milyon nga puhunan nga gikan usab sa iyang investors diin kabahin sa tuyo nila mabawi gikan sa dinakpan nga si online investment founder Antonette Pacana Sestoso.
Samtang dili pa masaka sa regular city jail ang suspek nga si Sestoso nga nag-atubang sa kasong large scale syndicated swindling sa piskalya ning syudad.
Kini human nangayo’g preliminary investigation si Sestoso aron motubag batok sa kaso nga gipasaka kaniya sa tulo sa gatusang investors nga pakyas na mahatagan sa ilang investment payouts.
Miingon si National Bureau of Investigation o NBI agents head Atty Alex Cabornay nga hulaton nila ang hukom sa piskalya kon kanus-a usab sila mohatag sa ilang tubag sa gipangayo nga preliminary investigation ni Sestoso.
Una nang gipangita sa investors ang dili mominus 13 milyones nga capital sa suspek nga pakyas niya mauli tungod sa kalit pag-undang sa operasyon niini.
