CAGAYAN DE ORO CITY – Dili palabyon sa Police Regional Office 10 ang pagpakang sa mga bug-at nga silot batok sa ilang pipila ka sakop kung makit-ang sad-an ilabina sa isyu sa online-sugal nga init nga hisgutanan sa nasd.
Kini human gihingusgan ni House committee on constitutional amendments chairperson Atty. Rufus Rodriguez sa distrito dos sa syudad ang total ban sa online games tungod sa grabeng epekto sa matag-tawo nga nalambigit niini.
Gibutyag ni PRO 10 spokesperson Major Joann Navarro ang pasalig ilang gihimo isip tubag sa mga reaksyon sa katawhan nunot sa pagkasikop sa bagitong pulis nga nanulis nga hinoon paspas nadakpan sa convenience store aron gamiton sa online sabong sa Bukidnon.
Miingon si Navarro nga dili sila magduha-duha pagpapha sa katungdanan isip pulis sa suspek kinsa aktibong nadestino sa Bukidnon Police Provincial Office kung molugwa sa imbestigasyon ang tinud-anay nga kalambigitan niini sa mga pasangil.
Kini ang rason nga uyon ang PRO 10 sa gihingusgan ni Rodriguez nga hingpit nang puhagon ang mga pasugal sa online kay namiligro ang tibuok katilingban kung dili kini masumpo.
Dumduman nga sa wala pa nanulis ang suspek ug mihimo sa privilege speech si Rodriguez sa isyu sa online gaming, dugay nang nagbahad ang PRO 10 nga likayan sa ilang mga pulis nga malambigit sa online-sugal aron dili maalanganin sa ilang mga kaugmaon ug mismo ang mga pamilya niini.
Hisayrang gikasuhan sa kasong pagpanulis ang suspek nunot sa iyang pagsignit sa 12-mil pesos nga kinitaan sa convenience store sa Brgy Damilag,Manolo Fortich,Bukidnon ug milihid na usab ang kasong administratibo sa Philippine National Police epekto sa kadaot nga nahatag niini sa ilang institusyon.
