Girespeto sa opisina ni Cagayan de Oro 1st District Representative Lordan Suan ang nagkalain‑laing opinyon ug reaksyon sa social media kabahin sa papel sa kongresista isip kabahin sa prosecution panel sa impeachment trial batok kang Vice President Sara Duterte.
Sa interbyu sa Bombo Radyo, gitataw ni Bert Amplayo, assistant district director sa opisina ni Cong. Suan, nga normal lamang sa usa ka demokratikong nasud nga adunay mga tawo nga mosuporta ug mosupak sa baruganan sa usa ka elected official.
Matod niya, tungod kay dili komunista ang sistema sa nasud, adunay kagawasan ang matag usa sa pagpahayag sa ilang opinyon.
Gitin‑aw usab ni Amplayo nga bisan pa sa mga misleading nga impormasyon sa social media nga makaapekto sa panan‑aw sa publiko ngadto sa kongresista ug sa iyang tahas isip prosecutor sa impeachment proceedings, klaro nga ang trabaho ni Cong. Suan mao ang pag‑research, pagtan‑aw sa mga ebidensya ug pagpresentar sa mga impormasyon nga adunay basihan subay sa legal nga proseso.
Busa, alang kang Amplayo, ang maong tahas ni Cong. Lordan Suan dili personal nga pag‑atake kondili kabahin sa iyang responsibilidad isip abogado ug mambabalaod.
