CAGAYAN DE ORO CITY – Gikasuhan na sa piskalya sa korte sa act of lasciviousness ug sexual harassment ubos sa akta republika no. 7877 si City Veterinary Office head Dr Lucien Anthony Acac ning syudad.
Kini human unang miduso’g reklamo ang babayeng empleyada sa piskalya batok sa maong opisyal nga natigayon sulod sa opisina sa miaging Agosto 2021.
Mismo si City Prosecutor Charisse Galarrita-Bitoon ang mi-aprobar sa resulta sa imbestigasyon sa iyang mga prosekyutor aron isaka ang kasong kriminal batok kang Acac sa hukmanan.
Una nang mihimo’g kaugalingong imbestigasyon ang city hall ug gipatubag ang maong opisyal samtang lahi usab ang gipasaka nga kasong kriminal sa biktima ngadto sa piskalya.
Dumduman nga mas gipili sa akusado nga magpakahilom kaysa mohatag pagtubag sa mga sakop sa prensa kabahin sa isyu nga gibato batok kaniya.
