CAGAYAN DE ORO CITY – Kasuhan sa direct assault ug frustrated murder in relation to the writ of court demolition order ang 28 anyos nga lalaki nga gitudlong suspek paglabay’g bato nga gikaangol sa opisyal sa pulis ug laing upat sa demolasyon sa gatusang balay sa Sitio Palalan,Barangay Lumbia sa syudad.
Kini human nadakpan ang suspek nga si Lemuel Labadan nga nagpuyo sa maong lugar ug kasamtangang detinado sa mini-cell sa Lumbia Police Station ning syudad.
Matud ni Cagayan de Oro City Police Office spokesperson Lt Col. Evan Viñas nga maoy samaron si Capt Reyman Pontillas nga nagsilbing deputy commander sa maong estasyon sa kapolisan.
Miingon si Viñas nga gidakop si Labadan kay siya ang gitumbok nga milabay’ng mga bato sa mga pulis nga igo lang naghatag seguridad sa demolition team nga nagsilbi sa mando sa korte kagahapon sa udto.
Siya miingon nga gipatuman sa kapolisan ang taas nga pasensiya tali sa mga emosyonal nga mga apektadong residente apan wala nila laumi nga kini moresulta sa komosyon.
Ipadayon sa korte ang pagpangguba sa nabiling mga istraktura ning adlawa.
Samtang namahayag usab si City Mayor Klarex Uy pinaagi sa iyang tigpamaba nga si Janboy Actub nga Enero ning tuiga pa lang gisugdan sa paghangyo sa city government ang mga residente pag-avail sa gihatag kanila nga relokasyon.
Apan sulti ni Actub nga walay bisan usa nga mipaubos sa ‘profiling’ aron unta pagsuta kon mo-qualify nga maapil sa relocation program sa dakbayan.
Dugtong niini,mihangyo ang mayor nga likayan sa mga residente ang pagsupak-supak sa balaod kay aron dili mapun-an ang problema samtang padayong mangita’g sulbad ang city hall alang sa gusto magpatabang.
