CAGAYAN DE ORO CITY – Miani sa suporta sa pipila ka sakop sa city council ang pagsupak sa simbahang Katoliko batok sa operasyon sa casino sa Grand Imperial diha sa Brgy Taboc,Opol,Misamis Oriental.
Kini human masayri ni Kag Edgar Cabanlas nga wala moagi sa ensakto nga proseso ang katukuran ug pag-operate sa maong balay-pasugalan.
Miingon si Cabanlas nga angay lamang imbestigaran sa Sangguniang Panlalawigan sugod ning adlawa ang lakang nga gihimo ni Opol Mayor Max Seno nga pagtugot nga masudlan sa casino ang ilang lungsod.
Una nang gikataho nga maghiusa’g puwersa sa laing higayon ang simbahang Katolika ug Pilipinista aron kusganong supakon ang Grand Imperial Casino diha sa lalawigan.
Samtang gikontra ni City Vice Mayor Rainer Joaquin ‘Kikang’ Uy ang kagustuhan ni Cabanlas nga manginlabot ang konseho sa operasyon sa casino.
Miingon ang bise-mayor nga wala sa hurisdiksyon ang dakbayan ang presensiya sa casino hinungdang dili maglabot-labot niini ang konseho.
Dumduman nga sa dekada 90,dako’g papel ang city council pinaagi sa ilang pagpalabang sa duha ka ordinansa aron supakon ang tinguha kaniadto nga katukuran sa casino dinhi sa dakbayan.
Una usab niini,gitawag ni Sangguniang Panlalawigan Majority Leader Board Member Gerardo Sabal III nga hupas na ang resolution of no objection o RONO nga gigamit sa munisipyo aron tugtan ang casino nga maka-operate sa maong lungsod.
