CAGAYAN DE ORO CITY, Philippines – Mibati’g kahupayan si Senate Deputy Minority Leader Risa Hontiveros human gi-anunsyo ni Presidente Ferdinand Bongbong Marcos, Jr., nga ipatuman ang “absolute ban” sa Philippine Offshore Gaming Operations o POGO Hubs sa nasud.
Alang sa senador, kadaugan sa kaliwatang pinoy ang hukom sa presidente nga wagtangon ang mga POGO, ug pangitaan sa alternatibo ug desenteng trabaho, ang mga naapektuhan sa pagsira sa mga Hubs, sa katapusang bulan ning tuiga.
Hisayran nga sa unang higayon, giyukbuan, gipakpakan, ug gibarugan ni Hontiveros ang pronouncement sa presidente sa POGO Ban, bisan anaa siya sa oposisyon.
Si Hontiveros, kinsa Chairman sa Women, Children, Family Relations and Gender Equality, ang usa sa 24 ka mga senador nga nangusog nga wagtangon na ang POGO tungod sa pagkaylap sa ihap sa kasong kriminal nga gikalambigitan sa mga insek batok sa mga kababaihan ug menor de edad.
Nadiskobrehan sa hearing sa senado nga tungod sa POGO, daghang mga insek ang nakapanarbaho nasud nga walay working visa, walay gabayran nga buwis, ug ilegal ang pagtukod sa mga pasilidad.
Gawas niini, nabulit ang mga hubs sa mga trabahante sa scam farms, love scam, cyber sex, sexual exploitation, kidnapping sa ilang mga kaliwat, ug ang akusasyon nga sila nangispiya sa lihok sa gobyerno sa Pilipinas.
