CAGAYAN DE ORO CITY – Gusto ni opposition city councilor Ian Achas nga pahamtangan sa disiplina ang mga sakop sa media nga e-responsable nga mohimo’g pagbalita sa mga kaso sa suicide dinhi sa syudad.
Kini human naglaraw ang konsehal nga mopasar sa ordinansa aron limitahan ang pagpalugwa sa mga impormasyon kabahin sa mga kasong hikog sa dakbayan.
Gitudlo nga rason ni Achas nga nagsaka ang suicide cases sama sa pagpanglukso sa pipila ka indibidwal sa mga tulay sa dakbayan tungod sa dili kontrolado nga reporting sa mga karadyuhan.
Namugos ang konsehal nga subay kini sa gihimong pagtoon sa pipila ka law school students nga nakabase sa syudad.
Samtang gi-kuwestiyon ni majory member Kag. Roger Abaday ang sugyot-ordinansa ni Achas kabahin sa limitasyon sa on-air suicide reporting gikan sa mga radio station ning syudad.
Miingon si Abaday nga angayang masayran sa Achas nga dugay nang nagsunod sa mga lagda sa Kapisanan ng mga Brodkaster ng Pilipinas ang mga estasyon sa radyo ug ang mg sako sa Cagayan de Oro Press Club.
Siya miingon nga wala sa mga radyo ang bikil apan anaa sa posted videos o graphics mga makita diha sa social media.
Samtang gisugyot usab ni Kag. Geroge Goking nga iapil sa maong sugyot-ordinansa ang partisipasyon sa Regional Anti-Cybercrime Unit 10.
Kini sa pagsiguro nga walay mga pagbugal-bugal ug magpataka’g komentaryo kabahin sa suicide issues pag-abot sa social media.
Giangkon ni Goking nga dako siya nga supak nga daw gikalipay pa sa pipila ka netizens ang pag-post sa mga kaso sa hikog sa mga tawo nga anaa sa grabeng suliran sa ilang mga kinabuhi.
