Laraw amyendahan sa 21st City Council ang karaang ordinansa truck ban.
Nunot kini sa nagbaha nga reklamo nga subling nadawatan sa konseho ning syudad.
Sa interbyu sa BOMBO RADYO kang Kagawad Roger Abaday, chairman sa Committee on Public Order and Safety, siya miingon nga erebyu nila ang ordinansa aron mapugngan na ang gabalik-balik nga bug-at nga trapiko, ilabe na panahon sa peak hours sa National Highways gikan sa Bugo, Agusan, Tablon, Cugman ug padulong sa Lapasan.
Gawas niini, usa sa perwisyo mao ang pagkadaut sa mga dagkung truck sa tunga-tunga sa dalan nga dugay ang responde sa kompanya. Wala pay labot niini ang mga disgrasya nga gikalambigitan sa mga forwarder nga nag-standby lang kilid sa dalan, bisan bawal parkingan.
Gibutyag ni Abaday nga nabati nila ang mulo sa katawhan ug laraw nga ipatawag ang mga miyembro sa Public Utilities Committee ug sa Road and Traffic Administration (RTA) aron pangayuan sa ilang mas maayo nga suhestiyon nga makagarantiya sa maayong dagan sa trapiko sa syudad.
Una niini, daghang mga netizens nga gusto multahan sa tag 1-MILLION PESOS ang mga makasala nga mga “truckers” aron dili na sila basta-basta nga makabiyahe nga dili maayo ang makina, ug ang multa, gamiton sa pondo sa pag hire sa dugang RTA enforcers.
