Gipahibalo ni Alvic Marie Francisco, gikan sa Child Protection sa DepEd Cagayan de Oro, nga kabahin sa ilang programa ang pagpahigayon og orientation alang sa mga ginikanan sa ika-upat nga adlaw sa opening block sa klase, niadtong Hunyo 11.
Dugang pa niya, importante kini nga lakang tungod kay aduna nay bag-ong order ang ahensya nga naglatid sa mga offense classification alang sa mga kaso sa bullying.
Subay sa gipamahayag ni Francisco, kaniadto naglisod ang mga tulunghaan sa pagpatuman og disiplina tungod sa kahadlok nga makasupak sa child protection policy, apan karon mas klaro na ang pagbahin sa mga kalapasan ngadto sa una, ikaduha, ug ikatulo nga lebel.
Busa, gi-orient usab nila ang mga tinun-an sa ikatulo nga adlaw pa lang aron masayran ang mga kaakibat nga silot kon sila moapil sa bisan unsang lihok nga makapa-endanger sa ilang isig-ka-estudyante.
Sa katapusan, tumong niini nga mga kalihokan nga mahatagan og igong kahibalo ang mga ginikanan ug mga bata aron malikayan ang pagtumaw sa mga kaso sa bullying sulod sa tunghaan.
