CAGAYAN DE ORO CITY – Gipahimangnuan ni City Councilor Jocelyn “Bebot” Rodriguez ang tanang brgy kapitan sa syudad nga timbangon ang mga bugas nga ipang-apod apod sa mga apektadong residente sa Covid-19.
Kini human nasuta sa grupo ni Rodriguez nga dili pareha’g gindaghanon ang mga bugas nga gipanghatag gikan sa lokal nga kagamhanan.
Miingon si Rodriguez nga maghatag kini’g dakong gubot sa mga residente ilabina nga gawas sa dili pareha’g timbang ang mga gipanghatag nga bugas, adunay mga relief goods usab ang walay de lata ug noodles.
Samtang gitin-aw ni City Mayor Oscar Moreno nga iya nang gisalig sa mga barangay kapitan ug social workers ang pagpang-apod apod sa mga relief goods alang sa mga residente sa syudad.
Siya miingon nga aduna unta siya’y nindot nga plano sa pagpanghatag hinabang apan wala kini masunod gumikan kay nakita niya nga giggutom na ang katawhan sa syudad hinungdan nga gidali ang pagpang-apod apod niini.
Nagpahimangno usab si Moreno sa matag kapitan nga ipatuman ang social ug physical distancing sa mga mokuha sa ilang relief goods.
